南記飯店 (已結業)

前排同朋友幫趁過一次南記﹐當然有叫最出名的鹹雞同滷鵝﹐呢兩樣唔需要多介紹﹐的確幾高水準﹐而我自己就比較喜歡個鹹雞多少少。另外叫左﹕胡椒豬肚湯- 正﹗重料胡椒﹐重料豬肚(仲有少少豬腸)﹐味道香濃﹐係比較正宗的潮洲口味﹐如果只飲慣廣東湯的朋友可能會覺得太重味﹐但係正宗應該如此的。如果冬天飲就真係一流。炸蠔餅- 炸得好香脆﹐蠔仔份量足﹐好大份﹐但亦都好油﹐食左三份二就已經滿口油食唔落。雖然炸蠔餅用油炸﹐有油都正常﹐但如果上碟前先用紙索一索D油應該會好D。鵝盒- 雖然係“特別食品”﹐但係食落都無咩特別﹐口感有D似炸芋泥﹐但味道就香口些﹐因為應該係用左五香粉﹐不過我個人不太欣賞。南記炒飯- 呢個唔錯﹐炒得香口乾身料又多﹐值得一試﹗其實南記價錢唔算係好經濟一類﹐但味道總算係不錯的﹐算物有所值一類啦...伙記態度唔算好又唔算差﹐反而收銀處的阿伯(應該係老闆﹖) 就非常好招呼又有禮。