閨•家 (美基樓) (已結業)

太好啦，閨家又再回歸屯門，佢地啲野真係好好食，唔怪得成日都要排隊。三點先黎，排左幾個人就有得入座，新店都係細舖，但比起之前同西九店已經比較濶落。次次都係食豬扒飯，今日黎試下新野咖哩牛腩飯，店員告知無辣同小辣已經賣晒，得返中辣同勁辣，哈哈，咁就試下中辣先啦，勁辣怕頂唔順。咖哩係杰身有椰香個種，中辣都唔算好辣，個人覺得啱啱好，撈飯一流。牛腩炆得軟腍，啖啖肉好正，如果可以有少少紅蘿蔔或者薯仔就好了，全部都係肉，哈哈。朋友叫左鹹魚煎肉餅併豬扒飯，呢款都係我至愛，廢事叫一樣我先去試新野㗎，哈哈。豬扒入味，少少脂肪位煎得甘香，咬落有肉汁又彈牙，真係必食好物。鹹魚肉餅超香鹹魚味，不過鹹，肉餅煎得香口，同樣有肉汁好好味，超正。唔少得嘅鹹菜同蔥油，撈飯好好味。太多肉所以加碟蠔油生菜，食返少少菜平衡下。叫飯有細老火湯送，因為呢度個湯好正，每次想叫手工麵都比個湯吸引住，哈哈，其實可以散點個湯嘅。星期一係青欖青蘿蔔杏汁煲豬展，好鮮甜好好味，零味精㗎。仲加左杯凍檸茶走甜，出面咁熱，點都要飲杯凍飲降下溫。唔使加一，抵食。