白鬚

營業中

休息中

「白鬚」一直都好想去試，但碼頭嗰邊間舊舖宣佈結業，結果都無去幫襯。依家知道係 WM Hotel 嗰邊重開新店，而且舖位仲大咗，當然要去食啦。餐廳最出名嘅「白鬚牛骨湯飯」，已經沽清，殘念。白鬚印尼牛丸粉（$85）接近30分鐘先上枱。牛骨湯聞落好香，但飲落好清淡。牛丸有5粒，黑椒味重，牛味一般，彈牙。湯粉係幼米粉，質地夠彈性，唔會一夾就斷，而且唔糊口，口感不錯。要咗少辣，會係牛丸上吱啲酸酸辣辣嘅醬。另外仲有一粒炸得太乾嘅炸雲吞、一片鬆脆嘅雲吞皮、一粒豆卜、一堆芽菜。印尼雞湯飯（$88）唔使5分鐘就上枱。湯底係微辣嘅黃薑雞湯，味道濃郁，但唔油膩，不錯。雞肉切粒，份量不少，可能係一直煮，所以肉質唔太嫩滑。另外仲有一大塊香脆印尼蝦片、半隻烚蛋、一粒豆卜、一堆芽菜及椰菜。沙嗲雞串（$63）約15分鐘上枱。有三大串，烤得好靚，聞落已經好香。雞串本身已經好夠味，而且外層微微焦香，裡面肉質嫩滑，再點埋沙嗲，味道層次再提升，好食。老實講，食物質素唔錯，餐廳空間感夠，環境可以，但收費始終略嫌進取。個人覺得係值得一試，但會否再次幫襯就要睇情況了。PS：另收加一服務費。