大勝軒丸一 (金星閣) (已結業)

成日覺得太古城中心嘢食嘅選擇唔係好多，前幾日喺OpenRice見到原來太古城附近有呢一間沾麵店，同太古城中心距離好近，所以就嚟咗試吓。餐牌嘅選擇都算多，沾麵同拉麵都有得食，但佢哋主打沾麵，所以我叫咗個辛野菜沾麵。麵條嘅份量有得揀，我揀咗普通但係份量依然好多，女仔未必食得晒。唔知大家知唔知正宗嘅沾麵嘅麵條通常都係凍上嘅，呢間就有得俾我哋選擇凍上定熱上沾麵嘅麵條多數都係粗麵，呢間都唔例外，可以吸到更加多湯汁之餘，口感亦都會更加緊實彈牙。呢個辛野菜沾麵係湯底上亦都令我幾驚喜。大部份我食過辣嘅日本拉麵湯底其實都唔算好辣，但呢一個絕對滿足到我對食辣嘅期望。湯頭唔算特別濃厚，所以麵條可以全部放入去都得，辣味好出眾。湯頭入邊亦都好多野菜，拉麵入邊我最鍾意食嘅配菜筍都有好多日式炸雞$30有五大舊，全部都係皮薄肉嫩，值得一叫。呢間絕對係水準以上嘅沾麵店，價錢公道，以後去太古唔怕冇嘢食啦。