Golden Monkey (已結業)

上星期日同媽咪，男朋友去 One Island South 食飯，發現 Golden Monkey 同 Pho Bar crossover 嘅一間餐廳。 餐廳樓底好高，有梳化位、吧台、沙律吧同一個開放式廚房 – 即煮越南湯粉。 呢度係自己填點單紙既，餐牌上有泰式沙律、小食、碟頭飯；Pho Bar 既越南河粉、喇沙同幾種泰式飲品，例如泰式奶茶同珍多冰。我叫咗一份「泰式海南雞飯」。同新加坡既唔同，唔係配黑醬油，而係雞飯醬。泰式雞飯配黄色同粒粒分明既有味雞油飯、炸蒜粒、芫荽；雞肉好嫩滑，分別係雞腿同雞胸部分。雞皮下既脂肪亦唔算多，值得一試。另外，喇沙都超有水準，可選米粉或米線。湯底非常開胃，椰香味唔太重，辛辣度適中，淡淡蝦米香，質地濃稠。米線亦煮得剛剛好，配料有雞蛋，魚片，魷魚圈同大量豆卜，推介推介呀！最後有「日本鹽味薯條」。薯條炸得脆身，以紫菜粉調味，配有三款醬料，包括我最愛既明太子美乃滋醬！我男朋友密密咁食喎，哈哈！