黑蒜 (太古廣場) (已結業)

喺金鐘一帶返工嘅人，永遠lunch都要成日諗食乜好，選擇唔多之餘價值亦唔係特平，所以好多時都會選擇買外賣，選擇相對好少少。有時經過都會見到呢間店，今日諗唔到食乜好決定入去試試。同朋友一齊叫左佢地個套餐，揀一個主菜，然後配上魚蛋同蔬菜，另外可揀湯或指定飲品。首先揀左佢個黑蒜清湯牛肋條，牛肋條軟韌度適中，唔會有過多脂肪得嚟又唔會太淋，炆得都算入味，入口時有微微辣，飯底都有牛汁餸飯食都唔錯，但有少少建議係如果有汁嘅餸最好有隔板分隔會好點。而飯面嘅蕃茄都好清甜。魚蛋夠哂大，口感唔錯，夠味不過都幾辣。另外食左豆醬煮魚，係一塊塊嘅魚塊，煮得夠淋都入味，唔算太有腥味所以唔錯。飲品就揀左有糖豆漿，口入冇渣，有豆味甜味幾唔錯。而價錢就唔但係特別平，不過各款飯佢地都會用雜殻飯，令成個餐又有菜又有殻，都好健康，而份量都大大碗。