華苑茶餐廳 (已結業)

位於香港最熱鬧嘅地區之一嘅銅鑼灣，一個午餐到底要幾多錢，呢間茶記只需要38蚊，雖然未必係最平，但都已經非常優惠。蒸排骨飯，餸嘅量唔少，飯更加係多，好似我胃口唔算細都食唔晒。排骨唔少係軟骨，但唔會咬唔爛，啱啱好，但汁略少，亦可能豆卜吸收咗，少汁唔夠送飯。跟餐仲送一杯茶/咖啡。呢個蘿蔔牛腩飯，蘿蔔仲有少少口感唔會太稔，牛腩就比較細塊，但數量都唔少，味道較濃，都幾唔錯。檸檬茶，正常無問題。D餐具都比較殘舊，未必好衛生。苦瓜火腩飯，個燒腩都幾肥下，味道比較淡，苦瓜都唔苦，味道主要靠個汁。有時仲會送個例湯，好似呢個係冬瓜薏米煲豬骨，佢湯料嘅配搭都幾有水平，呢個湯有D袪濕嘅作用，味道都可以，唔似味精湯。總括嚟講，38蚊嘅價錢，大碟飯，又跟餐有野飲，又送湯，記住呢度係銅鑼灣，上餐速度仲好快。但衛生比較麻麻，而且呢個地方好重陽剛之氣，顧客95%都係男性，佬味十足，應該唔會有一個女仔自己走嚟食。如果但求快，飽肚，呢個地方絕對可以係你嘅選擇之一。