籠太子點心專門店 (已結業)

睇戲之前明明食咗碗車仔麵，唔知我係未二度發育呢？因為一睇完戲出嚟，我個肚又打鼓喇！其實喺銅鑼灣有唔少宵夜選擇，但今日我同A姐竟然胃同步，好想飲茶食點心呀！結果我哋嚟到銅鑼灣嘅籠太子點心專門店，嘆番一盅兩件，好滿足呀！籠太子蝦餃皇餐廳叫做籠太子，又點可以唔食餐廳嘅招牌 - 籠太子蝦餃呢？呢度嘅蝦餃真係好好味，皮薄剔透，蝦肉又多又彈牙，夠晒新鮮呀！鮮蝦燒賣皇燒賣一向係A姐最愛，所以我哋梗要選擇一籠四粒啦！燒賣勁多蟹籽，而由於蝦同豬肉嘅比例啱啱好，除咗爽口彈牙，仲勁多肉汁，夠驚喜。鮮蝦菜苗餃菜非常清甜，蝦非常新鮮，比例啱啱好，食落非常有口感。略嫌皮太薄，夾起嘅時候，餡料流晒出嚟，但味道其實唔錯。雪山叉燒包雪山叉燒包一向受A姐歡喜，但可能夜茶關係，所以雪山叉燒包已經唔夠熱辣辣，而且叉燒份量極少，比較失望。蜜味叉燒腸相反，呢個叉燒腸嘅叉燒就夠晒多，而且腸粉夠滑，即叫即蒸，好好味。鳳爪排骨飯最估唔到係呢個鳳爪排骨飯簡直係今晚嘅亮點。排骨好入味，鳳爪又唔會蒸到淋pat pat，更重要係飯底索晒排骨嘅肉香味，唔使落豉油都夠惹味。