大澳德發 (已結業)

是日再訪銅鑼灣大澳德發，大約半年前已經同另一班朋友食過一次。當時覺得好抵食，最平嘅小菜只係六十幾七十蚊，但係絕對唔欺場，佢一樣可以俾到大排檔嘅份量同質素。呢個價位講緊係位於銅鑼灣嘅鬧市地段，唔係上水粉嶺、元朗天水圍，價錢嚟講已經跑贏同區餐廳一截。小菜款式選擇幾多，餐牌上有唔少特色菜品可供選擇，例如大澳鹹香雞、大澳海味雜菜煲、漁村三寶蒸肉餅等等。今日我就揀咗其他香口小菜，諗住遲啲有機會先食大澳特色菜。金磚豆腐拼花枝餅椒鹽豆腐＋三大塊花枝餅。椒鹽豆腐炸得香口，卻能夠做到唔沾油，豆腐亦夠滑。花枝餅食得出花枝用料好新鮮，完全做到外脆內軟嘅口感。蜜椒金薯牛仔粒近年到訪大排檔必點菜式之一，呢到都做得相當出色。薯仔大大粒，表面沾滿蜜糖好惹味。牛肉相當有肉味，用嘅部位更勝一般大排檔。生啫唐生菜煲天氣凍，當然要食啫啫煲去暖一暖胃。唐生菜特別適合做生啫，事關生菜易熟，靠醬汁同埋熱力已經可以逼熟，呢煲生菜做得好夠味。咁高興，叫返枝大枝裝Hoegaarden賀一賀佢，估唔到呢類型中菜館又有Hoegaarden供應，幾過癮！