Chang Thai Restaurant & Bar (裝修中)

一間裝修非常之精緻同埋清靜嘅泰國菜。喺銅鑼灣嘅L place 。同一棟大廈有齊好多個唔同嘅菜式，咁啱就見到呢一間泰國菜。可能係新開張嘅關係入到去都未算有好多人，但係樓下就有人派優惠券於是我哋都決定試一試佢。坐低之後我哋就揀咗幾個餸。首先嚟嘅係一個小食拼盤，佢真係好特別，係一個千秋上面放咗好多種唔同嘅泰國特色小食。例如話泰國生蝦，夠晒鮮甜。如果鍾意食辣嘅仲可以食埋佢塊青椒。主菜就係一個燒牛肉同埋咖喱軟殼蟹。燒牛肉配上佢哋嘅特別醬汁仲有加少少白飯係一個唔錯嘅配搭好值得大家去試吓。之後就係佢哋嘅咖喱汁軟殼蟹加埋蒜蓉包。蒜蓉包配咖喱汁完全係一個非常之開胃嘅菜式，食埋軟殼蟹就更加冇得頂啦。兩個冬陰功湯非常之足料，除咗有椰汁嘅香味之外仲有埋其他海鮮例如話兩隻大蝦同埋兩隻青口。唔記得講既就係佢哋嘅串燒，燒完出嚟仲有肉汁之外又唔會太硬骨骨。