楽壽司 (已結業)

銅鑼灣呢一間壽司店， 係朋友介紹所以先去試下 ，果然冇介紹錯，呢一間壽司好有水準， 我哋叫咗個九貫壽司套餐， 覺得物有所值。先講佢嘅裝潢，私隱度十分之高，出咗𨋢之後 有一道木門阻隔住，先可以行到入餐廳。 我哋揀咗壽司枱前面嘅位置坐，可以望到師父點樣預備食材。我哋 一開始首先食咗前菜， 同食咗個蒸蛋，蒸蛋有好多雜菌喺裏面 蒸蛋亦都蒸到好滑。每一樣壽司嘅質素都好高 ，師傅做完每一件壽司會將佢放喺枱上面嘅石碟度，直接畀我哋品嚐。 每一件壽司嘅味道都恰到好處，食材新鮮，而且師傅仲會將調味料加咗入壽司再畀我哋，唔會因為自己調味過度，破壞咗味道。最後就係飲味噌湯，味噌湯味濃鮮甜。甜品方面，有豆腐雪糕同紅豆雪糕兩種揀， 我同朋友各自叫咗一款，我品嚐嘅係豆腐雪糕，感覺上雪糕又滑又香濃應該係自家製。不過個人覺得呢一個餐， 可能只適合於比較細食嘅朋友，始終份量唔算大，九件壽司亦都比較細件， 所以男仔或者大食嘅朋友可能就會覺得唔夠飽。