閨•家 (西九龍中心) (已結業)

勞碌咗一個上晝，又到放飯時間，今日出面酷熱天氣，自我感覺一出去就會溶咗，所以決定留返喺西九龍中心搵食，難得閨家今日出面嘅人龍係可接受水平，於是就決定排隊入去。每次吸引我入嚟嘅其中一個原因，就係佢嘅冇味精靚湯，都市人真係好需要補一補。星期四係山藥南北杏合掌瓜煲豬展，佢唔單止冇味精，而且亦唔會過鹹，所以我真係好鍾意佢嘅湯，真材實料，又原汁原味。香煎蓮藕餅豬扒飯可以話係佢哋嘅招牌菜，每次嚟到都一定會點呢個餐，尤其鍾意佢嘅蓮藕餅，夠爽口，送飯一流！另外仲揀咗慢煮豬軟骨菠菜麵。慢煮豬軟骨份量勁多，基本上食曬個菠菜麵仲有一半豬軟骨，味道亦唔錯。菠菜麵味道幾清新，而且湯底都好味，所以其實就咁食麵都已經不俗。溏心日本蛋都好有水準，蛋黃夠香，估唔到小店都能夠做到咁出色嘅溏心蛋。滷水豆腐原來份量勁多，豆腐疊成兩層，而且滷得夠晒入味。下次一定會再嚟飲佢其他嘅冇味精湯水。