多多雞大排檔

營業中

休息中

今日約咗兩個朋友食飯，有個朋友臨時有嘢做要9點先收工，朋友就提議去佢工作地點元朗食，時間差不多我們相約去又新街，朋友推介多多雞大排檔，朋友仲話開到零晨四點，再夜啲都無問題。即時點了幾個招牌小菜，招牌即燒炭火靚雞及瓦缸炭燒豬頸肉，呢兩個菜式即叫即製作，其他地方好少食到真正炭燒，好香炭火味道，雞皮好脆卻少了肥膩感覺，豬頸肉同樣外脆內嫩點泰式醬汁更惹味。炸大腸炸到大腸皮脆卜卜，裏面又唔會乾身，火喉控制啱啱好。沙嗲金菇牛肉啫煲，上枱時仲啫啫緊，火氣十足，沙嗲味夠濃但唔會咸，牛肉嫩滑大大煲，唔會粉絲多過牛肉，真材實料。東江炒米粉有蝦米、蝦皮、魷魚鬚等炒米粉，有好香蝦味有鮮味。多多雞大排檔值得推介之處，沒有華麗嘅裝潢，以出品說話，相信廚師功力係有料到，好耐無喺其他地方食到咁有鑊氣嘅小菜，回味。