茶記冰室 (已結業)

已經有一段時間冇行過嚟石蔭呢頭食飯，今日趁住放假，本來想同先生過嚟食米線，經過石蔭路差啲嚇親，開咗好多新鋪頭，冰室都有兩間，連東亞銀行都變埋菜肉檔😧差少少以為自己幾年冇嚟！經過茶記冰室見入面都幾光猛整潔，先生話不如試下新嘢，聽聞餐廳轉咗手冇耐，一試無妨。餐牌選擇都幾多，除咗普通嘅粉、麵、飯，仲有好多小菜可以選擇，本來想試佢哋推薦嘅冰鎮鮑魚，但先生對鮑魚麻麻哋，於是揀咗幾個好餸飯嘅小菜。啫啫滑雞煲非常夠鑊氣，上枱仲「吱吱」聲，熱辣辣，加入豬潤、中芹、蒜頭同洋蔥，醬汁香濃，非常惹味😋滑雞煲的確係名不虛傳，雞肉非常嫩滑，肉質軟稔，至於豬潤雖然份量多，但就略嫌乾硬咗少少。沙嗲金菇肥牛煲醬汁豐富而且夠濃夠稠杰，撈飯一流！肥牛份量好多，絕對唔吝嗇😛加入大量我最愛嘅芽菜同青紅椒，仲有菠蘿非常清新解膩👍🏻金銀蛋白菜仔係比較少有嘅組合，一般茶餐廳都只會提供金銀蛋莧菜，而且價錢同一般小炒差唔多，呢度除咗有金銀蛋白菜仔之外，仲有金銀蛋菜心、芥蘭、通菜、西生菜同西蘭花揀，都不特止，除咗金銀蛋，烹調方法仲可以揀清炒、蒜蓉、亦腐乳、蝦醬、薑汁、上湯同濃雞湯可以自由組合，而且價錢實惠，有咩理由唔叫❤️金銀蛋份量都幾多