新華茶餐廳

營業中

休息中

OR人人對新華都是有讚無彈，我今次既食評，也只是錦上添花，沒太大意思。但在長記生活了廿幾年的我，不在此留番幾行字，好像又說不過去，就交一篇文章出來吧！兩個人來吃，點了飯餐同埋特餐，大家share食。飯餐的沙爹牛肉飯和凍檸茶，合共三十一蚊。飯端上來時，香氣陣陣，沙爹汁香口，只是少許辣，又帶微甜，十分惹味。牛肉稔身，入味，加上炒過的洋蔥，送飯是一流。大家吃過都讚不絕口，愈食愈開胃。特餐選了雪菜肉絲米及火腿奄列，飲品同樣是要凍檸茶，價值則是廿六蚊。先來的竟是米粉而不是奄列，吃茶記就是這樣不拘小節。雪菜爽脆可口，肉絲也很有味道，米粉幼滑，又是美味。火腿奄列即叫即做，溫度足，既有蛋香，蛋汁豐盈。雞蛋包著一大堆的火腿絲，相當配合。餐飽賣完，只剩下白麵包，也照殺。白麵包去邊，牛油份量不少，可以收貨。呢度既奶茶都幾出色，但當日已飲左兩杯，怕個胃頂唔順，還是不來第三杯了。改飲凍檸茶，茶味濃，檸檬多，夠冰凍，一樣了得。其實蛋撻雞批都好掂，不過胃納有限，惟有下次再來品嚐。