興樂菜館

營業中

休息中

黎到長洲梗係要食海鮮，碼頭出咗轉左直行，有一排海鮮檔，好多人會攞住個餐牌拉客。如果唔想食太貴，又唔追求好高質嘅海鮮，興樂菜館都係一個唔錯嘅選擇。我哋就嗌左六款小菜套餐 ($388)，喺餐牌任叫六樣嘢都唔過$400，相比其他餐廳算抵。白灼東風螺，份量都幾多，味道就一般，都係鍾意炒嘅會再惹味啲。椒鹽賴尿蝦，椒鹽味都幾重炒得幾香，不過呢個價錢就唔好預佢係好大隻啦，但係拆開左都有肉食嘅。薑蔥炒蟹，蟹就應該係用水蟹唔係啲好多肉嘅，不過薑蔥都爆得幾香，過吓口癮都唔錯。蒜蓉蒸蟶子，呢個有驚喜，份量多，蟶子嘅肉都幾飽滿，食到有鮮味，呢個幾推薦。蒜蓉粉絲蒸扇貝，呢個就明顯係用啲比較細隻既扇貝，其實就冇乜肉食嘅，但係粉絲同蒜蓉調味都唔錯。雖然全部嗌海鮮會抵食啲，但都想食個菜，就嗌咗清炒菜心。呢啲菜炒得夠香夠油，食落幾好食。總括我覺得呢間菜館嘅海鮮一定唔係好高質素，但係調味方面係唔錯嘅，加上價錢咁平，算係抵食嘅。以呢個價錢食到呢個份量嘅海鮮，啱晒黎到長洲想平平哋過下海鮮癮。