熾工房 (已結業)

住喺度5年多都未嚟過依間食嘢。今次終於的起心肝去試！好用心製作既小店 ～ 長洲難得一見！ 我哋一行4人每人點咗個套餐，除咗阿仔個熱狗餐之外，其餘3個餐都將薯條轉咗蘑菇飯。個蘑菇汁調校得得唔錯，佢有落忌廉去煮，但唔會太膩，老公仲追加多一個飯，汁又香又濃，十分推薦！我哋一定會再嚟食！另外炸雞都好好味，雞皮炸得勁脆，一咬落去「索索聲」！至於肉質方面，口感好嫩滑又有肉汁，但稍為淡左少少，似喺屋企緊咁唔會整到太重味，所以本人覺得佢醃肉可以略為重手d，嚟就番d重口味嘅食客(因為一定會有人話唔夠味😂)。另外，炸薯條都值得一讚，唔會切得太幼，即叫即炸，一上枱馬上咬一啖薯條，簡直辣親條脷！薯條又脆又熱，唔似麥記嗰啲又幼又唔脆，推薦！除此之外，牛油粟米杯同大啡菇都係正常嘢，自己喺屋企都成日整香草烤大啡菇，可以唔駛出去食。