一薯 (已結業)

行開旺角，見到呢間新開嘅炸薯條店「一薯」，見到啲人拎住一兜兜長薯條，上面仲有五顏六色嘅醬，真係見到都流晒口水，於是決定試一試。望一望餐牌，舖頭不外乎有三種嘢食：長薯條、粗薯條同炸雞。由於見到個個都係長薯條，所以都跟風叫返個，而不論長薯條或粗薯條都可以配唔同醬，例如黑松露蛋黃醬、車打芝士、日式青海苔等等，而我們就選擇了日式沙律併蕃茄醬。由於即叫即炸嘅關係，所以都要等好一陣先拎到，熱辣辣嘅薯條加上縱橫交錯排列嘅醬汁，的確係食完一條隻手又會繼續拎起另一條。長度方面，由於冇帶間尺，所以冇實際數字，不過目測長過筷子嘅！至於味道方面，咬落脆卜卜，但裡面嘅薯肉都仲幾鬆香，不過可惜薯條嘅油溢味較重，食多兩條，喉嚨會有怪怪嘅感覺，所以呢度扣咗唔少分，不過都值得一試嘅！