天竜 (已結業)

路德圍不嬲都好多餐廳，但食極都係個幾間，呢晚想食好野賀一賀present完畢…見到呢間舖面有日本野就膽粗粗入去，一開頭係俾佢店外個黑板價錢嚇左嚇，唔平要二至三百蚊一個丼飯，同區丼飯店都無咁貴，但好彩有揭下門外嘅餐牌，依…原來係丼飯兼備嘅居酒屋，牌內嘅價目反而係正常，甚至都叫抵。我哋叫左幾樣野，無食丼飯，下次再幫襯先食。刺身散叫，三文魚腩、油甘魚各三片厚切，四片帆立貝，赤蝦2隻，入口爽甜新鮮，驚喜！叫左兩串串燒，燒牛舌同雞頸肉，燒得剛好，牛舌嫩口有汁，雞頸肉都好惹味，調味夠哂，唔使再沾醬食。另外，仲有罕見嘅炸迷你池魚，粉醬薄口，條魚炸得岩岩好，肉嫩，整啖吞落口唔使吐骨，相信呢間嘅天婦羅應該都唔錯，下次再食。叫左啤酒飲，順便叫左碟燒明太子食，味道不過不失，唔會太咸，食一啖明太子，飲一口啤酒，正！最後仲有一碟玉子小卷，用嚟填肚，又唔想叫丼飯，驚食唔哂…另外呢間無收加一費用，日式餐廳黎講叫少見，收銀仲話時令食品係飛機貨，一星期飛兩轉黎港，叫我哋下次食，間餐廳無咩大宣傳，開左一年都唔覺眼，希望佢繼續長做長有啦，始終呢區好食嘅居酒屋無兩間。