圃公館 (已結業)

今日跟家姐姐夫去食開年飯，去咗一間喺皇后大道東酒店內的高級粵菜餐廳，實際上是食川粵菜，所以菜式有些是辣的。姐姐話佢最欣賞梅酒聖女果，我絕對舉腳同意，似杯雞尾酒咁好靚，車厘茄仔已經去皮，用梅酒話梅浸到又酸又甜，味道非常濃郁好好食，我連啲汁都飲埋，但係粒話梅就已經浸得太耐冇味道。但如果要選冠軍我就提名糯米雞翼，姐姐話這個菜是龍圃的招牌菜，這間圃公館正是龍圃的姊妹店，我第一次食，覺得很新奇，大大隻雞翼預先起肉，然後釀入糯米飯，一啖咬落去，雞外脆卜卜，糯米味香，配搭非常好。我哋仲食咗咕嚕蝦球，都幾好食，似咕嚕肉，因為用蝦肉就比較爽。查香仔骨都幾得意，茶葉好大片，我覺得似京菜川椒雞的川椒葉多個茶葉，因為用蜜糖調味，所以甜的好好食。環境服務都幾好，最好都係今晚我唔使出錢有得食，食得特別梳乎！