Burger Mix (已結業)

之前係"開飯團購"買左兩張「$15買原價$30的芝士蘑菇安格斯手打牛肉漢堡」今日去左試～午餐時間，隔離舖頭嘅快餐店都坐滿晒人，但呢間Burger Mix好冷清。間Burger Mix只做外賣生意，而且只得兩個店員負責整包同收錢。哇，係正隔離挖緊路囉，咁咪即係要我食塵？？？不過廢事白行一趙，塵都照食啦～啲包係即叫即整，一收到order個哥哥就入咗去煎牛同將包放入烤爐，所以就算得返我一張order都要等一陣。後來個冇表情嘅收銀姐姐仔都入埋去幫手，我親眼見佢幫手砌包。。。咦？？姐姐仔妳唔係啱啱掂完啲錢嘅咩？？做咩轉頭未洗手又冇戴手套就徒手砌包？？？？？？！唉。。。。。算啦，大菌食細菌。包熱辣辣好似好正咁。我見到原來套餐都唔係好貴，而且仲有學生餐（問咗星期六日都有）。試試包先～芝士顏色好深好鮮艷，又熱到溶晒，睇落好吸引，但點知原來冇芝士味的。牛肉唔錯，有牛肉味，而且都足料，又有點肉汁，不過鹹咗啲。蘑菇好味。麵包係芝麻包，夠香口。得一個包嘅份量唔夠飽，而且包一定要趁熱食。最不滿係衛生問題呢，要不然我諗我會再幫襯。