富都餐廳 (已結業)

今天約左朋友仔食早餐傾下計，去左元朗鷄地鳳琴路的富都餐廳食早餐。閒日呢間餐廳的早餐時段唔算太多人，可以同朋友仔傾住計慢慢食。見到呢間餐廳的門口放滿櫈，一到午市及晚市門口都要排隊等位，尤其是星期六、日，由早上到晚市都係好多人。餐牌多款組合早餐自由配搭，收費大約三十幾蚊，都好合理。我點左A餐($32)，包括有鮑魚火腿絲湯通粉、午餐肉煎鷄蛋配方包、凍咖啡(加$2)，合共盛惠$34。餸料味道唔錯，通粉口感適中，湯底味道不太濃我鐘意。午餐肉口感少少脆口，煎鷄蛋半生熟，午餐肉連煎鷄蛋夾麵包一起食好好味。凍咖啡的咖啡和花奶配搭適中，又不太甜。