大中華飯店 (已搬遷) 新店位置

其實已經多次嚟呢間飯店食飯，但原來冇寫過食評...噚晚又同士頭婆嚟得呢度開餐，當然必食呢度嘅招牌菜「黑椒鐵板豬手」喇，幫櫬咗十數次，次次都有食呢味餸，啖啖肉，食極都唔厭。其次就係食另一味「椒汁炒蟶子」，因為呢味嘢都幾辣下，吸收咗幾次嘅經驗，所以落單嗰時(呢間飯店係要自己寫餸嘅)，特別喺餸名後面括住『微辣』，但原來都係冇乜大作用，究竟係呢味餸唔可以唔辣吖，定係廚師唔識字呢...，雖然係咁，但呢度嘅蟶子確實好食，相信就算係辣到跳舞都繼續要食...自從上次約兩個多月前嚟過之後，發現呢間飯店要客人自己出去舖頭出面，佢哋自己另外經營嘅一間所謂士多買汽水啤酒，究竟搞乜呀，唔通冇酒牌所以要出此下策？就算係汽水都可以賣啦，出到去問嗰位士多主管(係一般飯店嘅啤酒女郎)乜嘢原因，但佢冇回答...另外，宜家又玩埋甜品，飯店嘅冷氣已經唔夠，我又點會喺呢度食埋店品呢...有兩味餸都要介紹吓，就係「椒鹽骨拼大腸」，同埋「黑椒鐵板肥牛粒」，都係相當好食，大家可以參考一吓！