喫麵 (K11 MUSEA) (已搬遷) 新店位置

今日同老婆嚟到係呢間係K11新開嘅鋪頭，主打東南亞麵食，仲以為剩係得麵，原來都有其他東南亞小食、甜品及飲品選擇。裝修簡潔，開放式廚房，見到大部份嘅員工都好年青，有活力。點餐可以手機同用鋪面嘅點餐機落單，自助點餐系統方便好用。新加坡喇沙好大碗，有好多配料，魚蛋、魚片、半熟蛋、蝦、豆腐泡等，湯底濃香，只有少少辣，感覺都幾正宗，$98性價比高。炸蝦薄餅有少少似中式炸雲吞，只是轉了蝦肉餡料。泰式冬蔭配炸木瓜絲，木瓜絲炸完似薯條，唔講爭啲唔知係木瓜，配泰式酸辣醬，香口嘢味。成都紅油抄手似燒賣多過似餃子，辣椒油唔會好辣，我覺得在辣多少少會更加配合。鮮芒果糯米糍都有長州的水平，芒果鮮甜，糯米皮皮薄煙韌。澳門葡式芒果木糠布甸基本上同澳門的出品冇乜分別，下次可以單獨買外賣攞走食。另外點了兩杯特色飲品：白熊牛油果，造型可愛，真材實料，冇加其他調味料或糖，鍾意食牛油果值得一試。黑熊珍珠薑奶薑味重，奶味濃又順滑，只係要食珍珠時隻黑熊有少少阻住，需要夾開佢才方便食珍珠。兩隻熊仔一黑一白都好得意。