皇苑 (已結業)

是日難得放假，下晝同老公行逛太古城，行到差不多食飯時間，老公話不如搭電車去東大街食飯，我二話不說贊成，因為一來好少去果頭，二來東大街名店林立。去到總站落車，原來老公已一早諗好食咩，咕嚕肉係佢至愛，佢想去皇苑一試招牌菜拔絲骨。既然佢想去食，當然奉陪到底。皇苑地面門口好細，酒樓要行上一層到二樓，行過未必為意。酒樓面積不大，屬於飯店格局，我倆不太肚餓，叫咗兩盅燉湯加兩個餸。根據中醫學不同顏色嘅食物歸屬人體嘅五臟，黑色入腎，咁呢個黑枸杞子燉竹絲雞一定係滋陰補腎。黑杞子同一般紅色杞子食味冇太大分別，雞湯入面除咗黑杞子竹絲雞外仲有瘦肉，雞湯味道鮮美。拔絲係將糖煮至一定嘅濃稠度，再將預先炸好既食物放到入糖漿中，快速攪拌，用筷子挾起食物時可以拉出長長嘅糖絲，通常都喺甜點製作出現，咕嚕肉真係第一次見。咕嚕肉炸得十分鬆脆，同糖槳好夾，連我平日不愛吃咕嚕肉都食上半碟。懷舊拔絲骨用蜜桃片伴碟，甜甜的很匹配。西蘭花大蝦球中嘅蝦球十分爽脆，西蘭花用上有一個份量，味道清爽，十分清宜。飯後甜品奉上南瓜西米露，南瓜味略淡少甜作為免費甜品已經不錯。