Gooday Cafe (已結業)

經過一整天忙碌嘅工作，放工後拖住疲乏嘅身軀急急腳趕去中環Gooday Cafe，因為佢哋收9點，朋友又已經等緊。但係去到皇后大道中，都搵咗一輸，原來入口喺一條橫巷入面。去到就即刻被擺喺門口嘅小飾物同埋個靚靚招牌吸引住，真係好少女啊〜〜 當堂覺得自己後生咗幾年！可能因為係平日嘅關係啦，餐廳冇乜人，好適合傾計。說回食物，Set Dinner一共有8樣嘢，我哋淨係需要選擇主菜。我哋一個叫咗青咖喱雞扒飯，一個要蘑菇四色蔬菜意粉，可以share嚟食〜 店員首先俾兩杯跟餐嘅烏龍茶我哋，好解喝，聽講仲可以去油！因為可以無限添飲，我飲咗好多杯！之後就上餐湯餐包。見好多食評都讚個包，真係唔錯，又係粉紅色，襯埋個花花湯碗，真係好靚啊！我哋都仲未飲完個湯，其他嘢就全部到咗，咁快？！因為其他d食物用個木盤一次過上晒。一次過食咁多嘢，感覺真係好豐富，好多姿多釆！值得一提嘅係個沙律醬好惹味，睇得出店家好用心。主菜嘅青咖哩雞扒令人好有驚喜，略帶刺激辛辣嘅青咖哩，估唔到同蜜桃咁夾！埋單每人大概百二，可以食咁多嘢，算係抵食啊！之前成日覺得樓上cafe嘅野食好hea，試過而度之後真係覺得都有d好俾心機嘅地方，真係令我改觀