日月堂

營業中

休息中

唔講唔知原來觀塘都有幾多台灣小店，呢間遠少少，但估唔到下午到訪都幾多客。午市時段為12:30至5:30，食物份量不變，但價錢相當抵食。食物方面除咗有經典嘅粉麵飯之餘亦有小食、甜品同飲品供應。喺附近返工嘅不妨過嚟試一試。粉麵選擇唔多，但可按個人喜好揀配料同麵條。牛三寶包含牛腱肉、牛筋同牛肋條，個人最鍾意後者，超級大條，份量十足，肉質軟腍，入口即化，牛味出，有驚喜。紅燒半筋半肉嘅湯底更加濃郁，配料就大同小異。而麵條要咗新竹米粉同刀削麵，米粉吸滿湯汁，刀削麵Q彈帶咬口，各有千秋。小食方面要咗炸鹽酥雞同豬腳，見每枱都有叫雞，果然有啲料到，有成八大件，外層炸至酥脆，而且個皮夠薄，內裏Juicy啖啖肉，性價比高。豬腳就有四件，炆得幾腍，QQ哋，吸滿醬汁，正。飲品有黑糖珍珠奶茶同香芋鮮奶，前者帶奶香氣，珍珠唔硬，後者似係甜品多啲，香芋份量十足，會回訪。