新容記海鮮坊

營業中

休息中

是日星期五，午餐諗住食返啲正嘢，就由黃竹坑搭咗幾個站去田灣食，相信無咩人會特登入到田灣食飯，正宗隱世。呢間新容記其實之前都試過一次，啲小炒好正，今日再去試啲正嘢。今日過嚟完全係為咗嗌個酸菜龍躉魚，上次嚟見到已經想叫，但咁啱嗰日老闆話龍躉唔靚，所以叫咗其他。餐牌其實無咩特別，小菜款式都同其他餐廳一樣，唯獨係有個廚師推介menu，有酸菜魚食，仲要用龍躉，真係唔係好多地方食到，仲有水煮牛肉都好吸引，下次再嚟試。四個人叫咗三樣嘢，但最後都食唔曬。酸菜龍躉份量非常多，仲有薯粉鋪底，辣度啱啱好；咕嚕肉酸甜開胃，炸得非常酥脆；乾炒牛河上次食過，今次encore都無失色，鑊氣十足；講開都想讚埋啲白飯口感蒸得啱啱好。最後埋單食咗三百幾四百，但都食唔曬，真係失禮，下次再去真係要控制好份量。