有機廚房 (已結業)

同老公平日去食個午飯，發現呢度又好似幾好坐就試下食。就咁叫一個主菜好似有啲貴，但其實佢包埋自助任食沙律，餐湯，餐包同甜品。今日餐湯係南瓜忌廉湯。唔算好濃，但都飲到有南瓜味，同埋無味精味 。麵包籃隔離有個麵包機可以即場整熱黎食，好貼心。麵包屬於中上水平，推介。黑松露忌廉汁煙鴨胸燴扁意粉($88)。好香嘅黑松露 醬汁有好多，食到底都仲有。除咗鴨胸仲有洋蔥三色椒做配料，誠意之作。紐西蘭羊扒配芥末籽燒汁($118)。羊扒嫩滑有羊味 ，不過得兩件有啲太少。配菜有用蒜蓉炒過，唔會淡茂茂。甜品有15款，總有幾款啱你口味。主要係啫喱同奶凍。甜品全部都唔會太甜，啱啱好。(右下角開始順時針)木糠布甸不過不失，未見驚喜。阿華田奶凍 好似一羹羹阿華田粉擺入口咁，好濃味。鮮奶燉蛋有好香蛋味。最讚係個 tiramisu，完全無偷工減料，入面勁多咖啡酒，回本之選。總結係，記得預多啲時間慢慢嘆個午餐。餐廳職員話有幾晚會有live band，應該會幾好氣氛。