阿一豬扒酸辣米綫

營業中

休息中

阿一豬扒酸辣米線今日山長水遠諗住去筲箕灣食雞蛋仔夾餅，點知兩間都因為疫情關係冇開，本身好無癮諗住去第二度食野架啦，但行行下筲箕灣東大街，見到有間米線好多人排，就坐低試下佢。餐廳係舊式茶餐廳格局，唔太乾淨，服務態度就見仁見智啦，今次就唔係幾好啦，串串地咁。。。但坐低咗，都照食啦，好食即餐廳，多數係有啲格既。酸辣豬扒紅薯粉豬扒有三大件，肉質幾淋身，而且非常入味。但今次食呢件就比較肥，好多肥膏位。而紅薯粉就正常。配料方面有花生，菜甫，酸菜等等，花生唔太新鮮，唔淋唔脆，但其他就正常發揮。湯底微辣，帶少少麻味，辣味唔會太嗆喉，配紅薯粉食幾唔錯。雪花羊肉卷酸辣上海麵羊肉卷份量好多，而且十分有羊味，幾有驚喜。而羊肉味同湯底更加夾，幾好食。而上海麵係比較粗既，食到最後都唔會吸得太多湯而淋晒。本人比較喜歡上海麵，比紅薯粉更有特色。