鮪世市場 (已結業)

去將軍澳尋幽探秘，嚟到gateway呢個街市以為得街坊嘢食啦，點知行行下見到呢間日本菜，鋪頭細細但格局已經不得了，有哂吧枱，見到師傅即席上壽司，簡直似去返第一次日本食壽司嘅鋪頭，餐牌仲有omakase廚師發辦！點可以唔試下呢？上菜真係一如所料，係用靚靚長碟放壽司，真係夠哂風味架！首先當然要食啲開胃嘢，玉子做前菜最啱！上湯味道同蛋嘅甜味都幾夾，有水準！至於飛魚子就夠哂大粒，一啖放晒入口，之後就成口汁，夠哂滿足！不過呢個芥辣八爪魚軍艦更加值得一試，好入味八爪魚又夠爽口，最推薦！至於主菜魚魚，呢度食嘢可以幫你重新認識一次吞拿魚家族，各式各樣嘅吞拿魚組合都好高水準，尤其係佢有個特選本鮪壽司盛，必叫！大中拖羅，再加赤身同軍艦，各有各出色！不過可能我妹仔肚，最愛都係中拖羅，油脂同肉比例剛剛好！不過值得一提係象拔蚌刺身，呢度係一大份上，唔係一般嘅切片，口感甜味另有風味！不妨一試！