夢の丼 (已結業)

同事推介下發掘咗呢間日本餐廳，門面同內在裝潢都好有日式小店嘅感覺，呢晚放工終於有機會去拜訪一下。 🇯🇵🇯🇵日本餐廳叫夢の丼，最signature一定係食丼。我地叫咗啲刺身同前菜，再加每人一個丼。 🍱🍱「夢之丼」- 一場嚟到，點都要試吓佢嘅signature dish. 食材極豐富，有三文魚蓉、三文魚子、帆立貝、牡丹蝦、海膽、松業蟹同左口魚邊，全部都好新鮮。特別要讚下海膽好鮮味、帆立貝大隻，入口十分鮮甜。上餐時店員附上一小杯自家製橙醋，可以先呷一口醒醒胃。🐡🐡「花錦魚生丼」- 有三文魚腩、吞拿魚沙律、蟹籽、三文魚籽同醬油漬蛋黃，食材一樣係咁新鮮，好出色。魚生連埋醬油漬蛋黃一齊食，更加突出魚生嘅鮮味。🐟🐟另外幾款刺生，包括深海池魚、油甘魚同帶子同樣都好新鮮。🦀🦀「蟹皇醬燒蟹膏豆腐」- 好香好濃郁嘅蟹肉蟹膏，配埋外脆內軟嘅豆腐，真係好夾，必食推介。🍣🍣另外職員推介嘅蔥碎吞拿魚腩卷亦都好味，吞拿魚腩好肥美。 估唔到土瓜灣有呢間隱世日本餐廳，不論環境同食物質素都好好，食完當去咗轉日本。值得推介！