一八六一廚房 (已結業)

又係burger控出動嘅時候，今次去寶林街市買嘢，發現原來呢度唔知幾時重新裝修，入邊仲係好多小店，當中見有間係食手工漢堡。見到餐牌選擇好多，感覺相當有誠意，揀咗兩個套餐試吓。🍔🍔套餐包一個漢堡、小食及飲品，我哋點咗「雙重芝士流心手打牛肉漢堡」同「他他脆魚柳漢堡」，小食要咗氣炸薯條同埋特色薯餅。🐮🐮雙重芝士流心手打牛肉漢堡 - 賣相已經一流，黑色嘅burger好型仔，塊漢堡極厚，十分juicy，芝士好澎湃。入口個包十分之鬆脆，外脆內軟，咬落口係有聲，充滿驚喜。🐟🐟他他脆魚柳漢堡 - 魚柳十分之巨型足料，炸得好香脆，配埋他他醬，好味呀。呢個包係粉綠色，好靚，打卡一流。包嘅質地都係一樣咁鬆脆，真係做得好出色。🍟🍟另外要讚吓個氣炸薯條，好有心思咁一半用咗薯仔，另一半係番薯🍠🍠。兩種不同口味，唔使淨係食薯條咁悶。加上用氣炸，冇落油，感覺健康好多。咖喱薯餅都整得好惹味，唔錯唔錯。📲📲小店係用手機app落單，外賣嘅話建議可以預早落單，咁去到就即刻有得拎，好方便。