Le Three (已結業)

無得去歐洲，去住le three過下癮先！呢度藍白裝修真係好有希臘feel，咁嘅氣氛同老婆一齊食西餐真一流！食完之後仲feel到主廚好有心機做食物，讚！先上嘅係粟米薯蓉忌廉湯，感覺同一般西湯有啲唔同！可能落咗薯蓉，口感豐富啲，味道亦都有新鮮感。之後出現嘅水牛城雞翼就夠哂驚喜，啲皮脆口又辣辣地，雞肉都入味，推薦！至於主菜，喜歡香口嘢嘅我就要咗個豬鞍，入味又夠香口，肉質又夠哂軟熟，啖啖肉香！我老婆話佢偏少少咸，不過因為有個清爽嘅柚子醬汁伴住一齊食，感覺剛剛好。不過呢餐嘅高潮喺最後，叫嘢飲時侍應姐姐推薦我哋特色飲品，因為佢哋會有期間限定飲品設計，日日唔同！所以我要咗個焦糖曲奇沙冰，感覺真係好特別，焦糖味好濃厚，加入沙冰入面別有一番風味！加上有啲曲奇咬下，真係好滿足！聽聞佢哋有意加入特色drink menu，可以期待一下呢。可能呢杯嘢飲又飽飽哋，最後嘅香蕉船甜品竟然食唔哂！(定係我胃太細...) 更重要嘅係...價錢真係好平民！又飽又滿足！