名人私房菜 (已搬遷) 新店位置

私房菜愈黎愈多，係尖沙咀想靜靜地同朋友食下飯傾下計，食下小菜真係好難，但私房菜就做到啦！5個人都可以有間房仔自己食飯👏🏽👏🏽👏🏽爽！雖然好住家，但食既野就唔係一般家庭會自己係屋企煮啦！大白菜豬肺湯，手工好繁複，又要啤水又要整返出黎，重重覆覆咁整幾次，諗起都煩！呢個整得好乾淨，好清新，仲有湯渣可以食，白雪雪👏🏽👏🏽👏🏽再黎個涼拌，味道與別不同，新鮮洋蔥，少少辛辣，好刺激味覺，但芒果好甜可以中和返！糖醋松子魚，又一個屋企唔會整既餸，條魚起肉又炸咁，又一工序繁複之作！炸到脆卜卜，但魚肉依然唔乾，糖醋味道岩岩好，仲用蘋果粒增加口感！仲有個胡椒蝦，連九層塔都炸得香香脆脆，蝦就大大隻，仲可以連殻食，胡椒味好香好惹味！