北京老家 (已結業)

散叫，非套餐。嚟得食京菜，主角當然係隻北京填鴨。隻鴨上枱時經肢解咗，佢話有一隻，我點數都算唔出係一隻鴨，不過算。啲皮睇到係乾嘅，反轉見到啲肉，令我想起已經仙遊咗嫲嫲嗰雙乾燥嘅腳板底！同鴨一齊上枱仲有配菜青瓜同蔥絲，啲青瓜個外貌又係乾到都感受到舊青瓜喺三日前被去皮切條，然後遺忘喺冷宮（冷櫃先真）。是日仲叫咗酸辣湯、小籠包、魚皮冷盤、素鵝、上湯津白、薺菜炒年糕、拔絲蘋果、高力豆沙，以上除咗酸辣湯、小籠包、年糕同蘋果可以外，其他都嘩一聲咁失望。