豐鍋雞煲 (荔枝角道) (已結業)

疫情有少少緩和就諗住食餐好嘅，因為實在太耐冇食雞煲打邊爐，出去食飯第一時間就諗起雞煲，呢間雞煲火鍋店主打係雞煲，緊係要叫黎試吓啦。雞煲一上枱已經好香麻辣味，店員話未食得住，佢就幫我地撈勻個雞煲，佢話再滾2分鐘d雞就啱啱熟，我地叫咗中辣，撈緊果時已經勁香，終於食得啦，d雞件吸收晒d麻辣醬汁，好惹味，其實中辣都幾辣，d雞食落都好滑，仲有大量紫洋蔥同芫荽，真係好好味。食完雞煲緊係唔少得打邊爐啦，頂級雪花肥牛，d牛肉肥瘦適中，好重肉味，唔會太油膩。麻辣雲吞，出面好少食到，咬落有少少麻辣味浸出黎，唔會太辣，入面d材料都幾豐富，有蝦，木耳同豬肉，食落好juice,都幾特別。手工即炸魚皮，呢個非常驚喜，d魚皮係成條魚嘅皮，係原條好大條，因為係即炸好香脆，上枱時熱辣辣，上面仲灑咗d椒鹽喺面，即食同放湯打邊爐都好好食。打邊爐唔少得飲野啦，我地叫咗2款特飲，烏梅汁，酸酸甜甜好開胃，個味道似酸梅湯，而水蜜桃梳打，好香水蜜桃味，加埋有氣嘅梳打，非常解渴。