風味館海鮮私房菜 (已結業)

適逢雞煲而家做緊特價，仲要係38蚊就有一煲嗰隻，實在平得太過瘋癲喇，唔嗌真係對唔住自己，落完單幾分鐘就有得食，雞煲香氣撲鼻，未拎到埋黎張枱就已經聞到啦， 雞煲我地揀咗少辣，個辣度啱啱好，全枱嘅朋友都可以食得津津有味，雞肉並無因為喺個煲入面而變得過火，仲保持著應有嘅嫩滑，食雞煲我鍾意連埋啲無乜人鍾意食嘅下欄一齊食，洋蔥青椒紅椒乜乜乜，其實佢哋索哂啲雞煲汁，絕對唔會比雞肉遜色，另外有二兩菜蔬無咁肉肉肉丫嘛。避風塘茄子，睇番餐牌避風塘系列入面，避風塘瀨尿蝦，豆腐，肉排，海蝦同雞呢啲司空見慣，避風塘茄子又真係唔係度度有喎，新屎坑嘅我梗係會即刻嗌黎試下啦，茄子外層被炸得酥脆，難得嘅係入面仲保持著肉嫩多汁，加埋面頭嗰炸我最愛嘅蒜蓉同埋蔥花，呢啲咪叫享受囉。金瑤扒時蔬，用得瑤柱黎扒梗係揀豆苗啦，一上檯已經知道似樣喇，碧綠嘅豆苗被瑤柱同埋金菇等等緊緊咁樣擁抱住，誰也捨不得誰，一住過咁擺入口一齊食就係最高境界啦，瑤柱嘅比例勁多，多到全天候咁包圍住佢地。