雞翼山 (謝斐道) (已結業)

呢日响世貿做嘢搞到3點幾未食晏，今晚仲有飯局，打算去買魚蛋燒賣食，經過呢間雞翼專門店，被各式各樣味道吸引。見有不少人企响度食好滋味咁，一於唔食燒賣改食雞翼。原本想試菠蘿油王子，可惜已經售磬，選擇困難症又發作，終於叫咗3款。文青風玫瑰，我係咸檸七、菠蘿啤酒麥香風。口味名稱夠搞笑😁全部雞翼都係即叫即做，所以過咗隔離買杯珍珠奶茶飲住等，原來兩間舖係同一個老闆。由於呢幾日店舖做緊限時優惠，撞正有張大外賣單在前面，所以要等得耐啲，趁機影吓相。終於到喇，一拎上手，嘩！真係熱到拎唔到，要等一陣先食，以免辣親個嘴。菠蘿啤酒麥香風$38雞翼香脆帶有微微啤酒麥香，上而鋪滿菠蘿粒同醬汁，好特別又惹味。肉質仲係好嫩滑架。文青風玫瑰$38好靚又好香玫瑰味，雞翼表面香脆內裡嫩滑，仲有一股蜜糖嘅甜味，又香又甜好好味。我係咸檸七有舊鹹檸檬响度架，味道清新酸酸甜甜，又真係幾鹹檸七喎，特別又好味，正呀！黑糖珍珠鮮奶 (大) $35呢個好飲，唔會好甜，珍珠口感軟韌，黑糖夠香，好味。