媽咪雞蛋仔 (已結業)

行街見到間舖名好得意，叫媽咪雞蛋仔。佢哋有好多唔同口味既雞蛋仔之外，仲有唔同口味嘅格仔餅 ，款款都好似好好食，真係搞到我心大心細。最尾我叫咗原味雞蛋仔加雲呢拿雪糕 同埋黃金雞蛋仔。另外仲叫咗兩杯飲品， 分別係芒果沙冰同埋港式奶茶豆花。其實一直都覺得，原味雞蛋仔係最好食嘅。今次加埋雪糕落去，估唔到又幾夾㗎喎，仲以為啲雞蛋仔會畀啲雪糕整到淋晒結果梗係唔係啦。媽咪雞蛋仔嘅雞蛋仔比平時出邊食嘅雞蛋仔挺身，真係好好食。而黃金雞蛋仔其實就係加咗鹹蛋黃， 完全緊貼到潮流，依家興加鹹蛋黃入食材到，夾埋鹹香得黎又甜甜地，真係好得意好好味。最後想提嘅係佢嘅飲品，港式奶茶豆花 ，飲落去有少少似飲緊珍珠奶茶咁，但係當然口感就係豆腐花而唔係珍珠啦。佢咁多味下次要再去試過先得。