Reserva Ibérica • The Ham Shop • Signature Kitchen (已結業)

之前約咗個朋友食飯，朋友鍾意食西班牙菜，之前去開灣仔見到間餐廳食西班牙菜，所以決定去試下。餐廳位於灣仔船街，地點旺中帶靜。一入到去見到廚師用純熟嘅刀法，喺度切緊西班牙火腿。餐廳裝修好有特色，經過樓梯上到二樓，環境清靜，而且帶一種浪漫嘅感覺。餐廳結合了零售、輕食及休閑高級餐廳三個概念。Tasting Menu 每個月會轉換一次，極具心思，仲啱晒啲唔想諗食乜嘅人。Berdie Amor 口感柔順，清新優雅，帶果香。青瓜杏仁青蘋果凍湯，味道清新，而且好健康。香脆嘅多士放滿配菜，加上鯷魚味道相當豐富。手切西班牙火腿 ，油份豐富入口帶鹹香，具咬勁，與蕃茄香草多士十分配合。藜麥煙韌有咬口，加上八爪魚，再配合紅菜頭獨特嘅味道，整個菜式口感豐富。飯粒乾身，加上大量海鮮，蜆大隻，蝦鮮甜彈牙，再配合西班牙醬汁，十分美味。蛋糕朱古力味香濃，雪糕混合曲奇碎，並以焦糖增加風味，甜度恰到好處。餐廳食物具特色，店員細心介紹每一個菜式，而且價格合理。