江南瀨粉 (福榮街) (已結業)

瀨粉，廣傳係源自廣東省佛山市嘅著名傳統小食，平時去中國旅行或做野先有機會食到，喺香港就比較少機會食到正宗瀨粉，今日遲收工，就過咗嚟深水埗食下呢間瀨粉舖頭，老闆娘都好似係佛山本地人。呢間主打當然係瀨粉，我見嗌兩個餸都要三十幾四十蚊，不如直接嗌碗大嘅食，所以揀咗大大碗瀨粉($49)，佢可以揀清湯/酸辣/麻辣湯底。見天氣凍凍地，就揀咗酸辣湯底暖下個胃。一碗瀨粉有成13味餸，仲有啲係比較高質嘅食材，例如鳳城水餃、黃沙豬潤、雪花肥牛。呢到要特別提一提鳳城水餃，好大粒好足料，以呢個價位嚟講食到呢個質素真係唔話得。仲有呢塊黃沙豬潤，口感幾好，整得靚嘅黃沙潤係特別爽。除咗大大碗瀨粉之外，今次好胃口，仲叫咗個小食 - 酥炸蝦卷($28)，都幾意外地，蝦肉用料幾靚，呢味野一定要蘸泰式甜酸醬一齊食，最夾最好味!食辣野，唔整返杯凍檸樂點得，爽啊！店外招牌，喺深水埗鬧市當中都好易認。