Mela Italian & Spanish Cuisine (已搬遷) 新店位置

中午放飯同事話提議去食西餐，我話西餐唔平喎，同事話佢食過算做經濟，咁我信佢啦。雖則係工廠區，但入到餐廳都夠新淨，環境都舒適。同事話要必食份沙律，因為好少地方有得食，原來係藜芴同紅菜頭沙律，紅菜頭切成粒粒，爽之外又多汁還帶有甜味，仲有蘋果粒作伴增加多樣性，加埋好多細粒既藜芴，係好健康既配搭，口感方面藜芴既細細粒同松子仁既脆口形成對比，相信配搭上廚師的確花左唔少心機。意粉叫左蜆肉墨汁麵，墨魚汁麵食得多，呢度係墨魚汁闊條麵之餘，仲係手打既。口感係增加左之外，墨魚汁味係更重，而且唔會過鹹，因為配合返蜆肉本身有少量鹹味。蜆肉雖然細隻，但係就清甜，唔錯唔錯。主食方面就要左燒豬肋排，成份肋排大過我塊面，有成10寸長，佢唔會燒得好乾身，仲有肉汁與少量脂肪聚集，令成份豬肋排口感一流。最欣賞既地方係佢燒得比中式叉燒還好，因為豬肋排外皮燒得脆口，但內裡仲有唔少肉汁，睇得出廚師既功夫所在。