影片
更多
2009-12-28
249 瀏覽
今晚的生日飯，蜜糖兒一個月前已經同我討論打算去邊度吃，有幾個選擇，最後決定去試位於尖東帝苑酒店嘅意大利餐廳 - Sabatini，名就聽得多，甚麼最佳食肆之類，呢間餐廳總店在意大利羅馬，由Sabatini兄弟創立，計埋香港呢間，全球有三間。平時去同層隔離嘅 coffee shop食buffet就試得多，今晚終於可以一嘗所願。門口不顯眼，入去先是有兩位receptionists再加一位西人迎接，經過一個lounge，之後係一個高了兩級嘅地枱，上面擺放咗好多意粉，有埋價錢，有興趣嘅可以買埋返屋企，再入就係一張長枱，擺滿了各式意大利頭盤小吃，旁邊有幾張細枱，最後就係用餐大廳，雖然多數都係細方枱，但係中間有一張大圓枱，可以供6人坐仍然非常寬敞。佈置非常有意大利鄉村味道，地面是舖上階磚，樓底矮矮的。而且我地張枱側邊放有一張流動細枱，見侍應會用來上菜前分配食物之用。埋位之後，餐巾擺放好，水杯放好，經理已經立即送上今晚嘅menu，除主餐牌外，仲有一張佢地現時做緊嘅季節推介，白松露做嘅菜式。經理介紹咗佢地好多客人會試嘅幾道菜，同埋佢地廚師嘅特別推介，重點係介紹每日晏晝空運到港嘅龍蝦做嘅Risotto
門口不顯眼，入去先是有兩位receptionists再加一位西人迎接，經過一個lounge，之後係一個高了兩級嘅地枱，上面擺放咗好多意粉，有埋價錢，有興趣嘅可以買埋返屋企，再入就係一張長枱，擺滿了各式意大利頭盤小吃，旁邊有幾張細枱，最後就係用餐大廳，雖然多數都係細方枱，但係中間有一張大圓枱，可以供6人坐仍然非常寬敞。佈置非常有意大利鄉村味道，地面是舖上階磚，樓底矮矮的。而且我地張枱側邊放有一張流動細枱，見侍應會用來上菜前分配食物之用。
埋位之後，餐巾擺放好，水杯放好，經理已經立即送上今晚嘅menu，除主餐牌外，仲有一張佢地現時做緊嘅季節推介，白松露做嘅菜式。經理介紹咗佢地好多客人會試嘅幾道菜，同埋佢地廚師嘅特別推介，重點係介紹每日晏晝空運到港嘅龍蝦做嘅Risotto (menu上係用market price)，有兩款選擇，細size嘅 Boston 龍蝦 (~$5XX)，大size嘅Australian 龍蝦 (~9XX)，每晚每款各三隻，即只可以供應六碟，亦因為我地七點幾就到，時間尚早，可以多啲選擇，而且講到明當晚賣唔出，係唔會留至第二日用，保證新鮮非常。
未落單前，我地諗住叫酒飲，於是乎就諗住叫個drink list睇，點知真係孤漏寡聞，佢地嘅drink list只有果汁、烈酒、cocktail、咖啡之類，而紅、白酒係分開喺另一本menu，wine list入面就再有分appetizer wine, sparking wine, white wine, red wine. 紅、白酒大約由最平嘅$4xx，貴至~$6xxxx幾蚊一支都有供應，真係要幾豪有幾豪，大部份就係四位數，大約$1000-3000支酒，menu除咗有一個總表列出所有酒之外，每一頁仲有每一隻酒嘅詳細資料，就算連佢出產地嘅地圖都比埋你睇，厚到成本電話薄咁。
講返主餐牌，入面大致分開幾大類，頭盤、湯、意粉 (茄汁 & 白汁)、意大利飯、燒烤嘅肉類主菜。去到意大利餐廳，當係要試佢地嘅意粉同Risotto。我地今晚叫咗一支酒、一個頭盤、一碟意粉、一碟Risotto，最後一個甜品。
1. Assorted Bread - 意大利餐廳嘅指定動作，先送上一藍麵包。有四種款式，香草軟包嘅外層幾多油，但係亦因為咁而令到麵包特別香 ; 薄脆做得非常出色，外面有著餅乾嘅脆，咬落去仍有麵包嘅軟，不會過硬 ; 意式麵包亦做得比一般出面街嘅濕潤，不致於像歐洲麵包般乾 ; Grissini 麵包條就普通咗啲。醬料有幾香豆茸醬、幾酸但充滿茄香嘅乾蕃茄醬、香草醬就不過不失 ; 雖然牛油係用Margarine，沒有動物嘅油脂，但總算係淡得嚟香的貨式，比較健康之選 ; 意大利黑醋及橄欖油未算係一試難忘。
2. Maculan Breganze 2006 $530 - 這支白酒雖然已經算係屬於wine list入面較平嘅選擇，但酒店始終係酒店，經過揀選而擺得入menu嘅，通常都可以放心佢嘅質素。我地本來因為之前幾日飲過意大利出產嘅白酒，今晚想轉返飲法國出產嘅，但原來發覺menu入面全是意大利出品，別無他選，下次再來時呢一點需要注意。
3. ANTIPASTO DELLA CASA ALLA ROMANA / The Roman antipasto table $258 - 之前經理都有介紹，就係用一隻碟喺出面嘅appetizer table度攞一次，可以任攞，選擇非常之多。佢地亦提供一個選擇，可以由佢幫你攞，會每樣攞少少比你試，不過我地選擇自己操刀。Salami香味十足，仲有另一款cold cut都係 ; Parma ham with melon 水準之作，Parma Ham香氣撲鼻，melon又大又甜 ; mushroom用油浸過，又滑又香 ; 凍蝦和帶子屬上乘兼超新鮮貨式，又爽又鮮甜 ; 三文魚同茄子不過不失 ; 最後嘅意大利蛋批做得出傳統風味。其實仲有好幾款菜式，但不是我地嘅favourite，所以冇試到。
4. LINGUINE ALLA SABATINI Linguine with scampi, clams and mussels, a Sabatini original $348 - 餐牌裡的意粉亦分開蕃茄醬和忌廉汁兩大組合，入座時經理向我們特地推介呢款菜式，寫住屬於餐廳傳統菜式，既然講到咁出名，一定要試埋啦。份量不特別多，只是一份成年人主菜份量，侍應上枱後慢慢細心地幫我們分成兩份，配料海鮮亦均勻地分配，每人都有大大隻肉質爽嫰大蝦(scampi)，而唔係用小蝦 (shrimp)，還有蜆用及青口 ; 意粉彈口，軟硬適中，有少少煙韌感覺，揀選扁麵亦粗幼適中，不會導致沾上太多或太少汁 ; 茄汁雖不致於非常仲蕃茄味，但就適可而止，甜酸程度不會搶奪海鮮嘅味道，屬酒店級應有的高水平。
5. ASTICE O ARAGOSTA ALLA SABATINI Oven baked lobster, an original dish created by Francesco Sabatini (Boston lobster market price ~$5xx & Australian lobster market price ~$9xx) - 我地最終叫咗細size嘅Boston龍蝦 $538，雖然經理推薦我地食大size嘅Australian龍蝦，佢覺得不單止份量可足夠兩個人食，而且亦因為龍蝦殼大啲，將飯釀入去嘅空間亦都多啲，但我地就想試多啲其他菜式。上枱係用一隻小鐵鑊盛載著，底層舖滿飯，上面有大大隻嘅 Boston 龍蝦，蝦身已經分開兩邊了，兩隻大蝦鉗亦分成四份，一上枱未食都都經香氣撲鼻，侍應隨即為我們分成兩碟。我們每人一碟可以將蝦身分食兩大舊肉，再加埋每一隻蝦鉗兩件肉，其實一隻分量足夠我地兩個享用了。
龍蝦肉非常容易離殼，新鮮非常，又厚肉且香甜無比，大啖大啖的咬著，能享受如此豪吃的感覺，簡直係人生一大樂事，我永遠不會忘記此刻蜜糖兒為我找來的這一種味之感覺 ; 所有蝦肉同飯嘅表面都被濃濃的龍蝦汁包圍著，配合埋意大利飯，可以在不影響龍蝦肉口感之下，同時享受兩種口感，我們都認為廚子選擇正確，因為餐廳亦提供意粉選擇，但始終Sabatini原意係用飯，果然係有佢嘅道理。最後要提到蝦頭入面嘅蝦膏，可以用氾濫來形容，多都不得了，全部係軟膏，再一次只能說"香甜無比"。
東方嘅中國我認為上湯焗龍蝦配伊麵底故然可以話係將龍蝦鮮味發輝到淋漓盡致，但西方嘅呢一道龍蝦Risotto，亦都有著另一種層次。
6. Tiramisu - 飯後侍應沒有為我們端上甜品餐牌，反而是推來一架載滿甜品的餐車，上面有著很多款精美甜點，但唯獨是不見了Tiramisu，我們只好詢問是否今晚沒有供應，原來只不過係冇放上餐車。侍應為我們逐一介紹每款糕點，非常詳細。
全晚都有一隊live band駐場，初時佢地在場中間獻唱，之後佢會逐一去到每枱賓客面前高歌，應該係佢地預先較好時間，等到我地食甜品之時，佢地專登移步到我倆面前唱生日歌，雖然佢地四個係南亞裔人士，但係佢地唱完英文生日歌，仲可以即刻轉channel，整返首中文版生日歌添，最後我仲即時點咗一首 "I Just Called to Say I Love You"，我當然仲驚佢唔識唱添，但未唱之前，女主唱仲可以同我講笑一番，佢地簡直係又唱得talk得，非常鬼馬，又懂搞氣氛。
蜜糖兒預先在訂枱時已經說明今日有人生日，餐廳亦為我地準備好一件蛋糕，但因為我地叫咗甜品，所以他們就索性將蠟燭放上Tiramisu。酒嘅份量控制得恰到好處，唔會因太多而導致太濕太重酒味，亦唔會因太少而乾，做得頗挺身。意大利甜品又點可以少得Tiramisu，雖然只是一件少少的蛋糕但就可以試得出甜品師傅嘅功架，呢度嘅師傅絶對稱職。
7. 朱古力及餅乾 - 雖然我們已經沒有肚可以品嘗他們的咖啡，但仍然送上他們的朱古力及餅乾，朱古力就膩，不過餅乾好鬆脆，就咁品嘗亦非常可口。
雖然係平日晚上，但仍然坐無虛席。全晚侍應雖不算是太醒目，但就非常熱情，笑容滿面，專業，服務可嘉。Sabatini 呢個名，果然名不虛存，佢地亦沒有在全球大肆擴張，要保持高水準之作，實非易事，但我相信佢地絶對做得到，將高水平意大利菜原原本本地搬來香港，好使我可以嘗到今晚一世難忘的生日飯。
Full photo blog @ http://hk.myblog.yahoo.com/mokharvey/article?new=1&mid=2483
張貼
