來多碗車仔麵 (路德圍) (已結業)

車仔麵只係好普通嘅食物，越係普通就越難整得一試難忘， 所以一般嚟講車仔麵最緊要餸菜選擇多， 湯底唔可以太多味精， 麵既質素要新鮮，同埋要有唔同嘅調味料去迎合大眾既口味。呢間來多碗車仔麵就做到哂以上既野，首先車仔麵可以選擇的餸菜種類好多，而佢哋有好多款推介嘅餸菜都整得好好味，就好似章魚燒，牛筋丸，墨魚丸，魷魚，蘿蔔，全部都好好味好有質素好入味，同出面一般街檔嘅車仔麵好唔同，就咁烚熟，淡而無味咁。而車仔麵湯底清甜，唔會話落咗太多味精，食完都唔會覺得口乾，湯底加埋牛腩汁，有牛腩味得嚟又有色水，唔會好似啲冇色冇味嘅湯底咁樣搞到你食都唔想食。車仔麵麵嘅質素亦都好好，特別是係個河粉，河粉唔會一嚿嚿，夾個時唔會斷開曬同爛曬，係可以好似普通麵咁可以夾出一條條咁黎食。另外最欣賞嘅就係呢間車仔麵嘅調味料，佢主打秘製辣醬同埋地獄辣醬，兩款辣醬都好有辣味，唔似一般嘅辣椒油，辣味唔重之餘仲油浸浸，真係啱曬啲鍾意食辣嘅人。