泰越概念 (已結業)

而家銅鑼灣真係多咗好多美食大廈，上樓搵食真係大勢所趨。最重要係好多新餐廳可以用app book，啱哂篤篤篤一族。顧名思義，v.thai又有泰又有越。事不宜遲即刻叫個泰越拼盤食吓先。呢個泰越拼盤真係無呃人，上至魚餅下至蒜蓉法包，左至串燒右至軟殼蟹，平時喺泰國菜餐廳或越南菜餐廳最常叫嘅小食都有。味道中規中矩，勝在大堆頭。青木瓜沙律材料幾新鮮，但味道略淡。附送嘅泰式辣汁其實有啲奇怪，som tum咁食都係首次。香草燒雞上菜時熱辣辣，而且醃得唔錯，食落都好惹味。雖然伴碟有酸瓜感覺未必正宗，但又幾好食同埋配合成件事喎！一向唔係泰式咖哩嘅愛好者，不過朋友叫到都一齊試試。呢碟青咖哩好奇怪地一啲都唔辣，反而係甜甜地。蒜蓉炒椰菜苖，正正常常咁。不過其實喺香港食到似樣少少嘅椰菜苖都唔係咁容易，好多時啲苖又老又韌，所以相比之下呢碟算唔錯。最後嚟個焦糖燉蛋，叫做有個甜品食吓，但其實佢個面唔多脆，而燉蛋亦無乜香味。雖然食完有少少唔知自己泰咗，越咗定香港咗，但至少喺呢度，食得正常，坐得舒服咁啦！