喇沙大少 (已結業)

初時想快食快走趕睇戲，貪佢有位唔使等，即入，點之中晒計。叫左個雞喇沙，蝦醬炒飯，肉骨茶，3樣野各有特色。😨雞喇沙名乎其實地雞，如幻似真，搵唔到有雞，湯亦搵唔到雞味，到底是有雞定冇雞？好一個雞喇沙。成碗野冇乜味道，最啱感冒個陣食，反正都冇味覺。蝦醬炒飯仲有感覺，因為好……唔識講，食落口同食瓷飯一樣，係一樣，即係飯有飯味，餸有餸味，兩者各為其主，亦河水不犯井水，好難先可以將飯炒食咁。當中最發人心省既係，其實馬來西亞既蝦醬係唔係淡淡地，好似1比99既川貝枇杷膏咁既味！到肉骨茶出場，其實個侍應放低左我都未知，因為佢簡直去到一個金庸武俠小說中，用毒高手最高境界，就係無色無味無嗅！一煲好似津路加杞子加3條金沙骨既肉骨茶就係咁出場。本人對津路有極高評價，絕無任何貶斥之意，不過我真係想不到有其他更貼近的比喻先用佢做例子。食完成餐之後，都係地下老麥再補飛。