Okashi Galleria x Calbee Plus (已結業)

黎得呢到當然要食即製卡樂B 薯片。我前前後後都食過幾次，試過薯條，其他唔同味既薯片，最後都係返璞歸真，原味最好食。佢薯片個特點係厚切，比袋裝既卡樂B厚身，而且即製有個好處係冇咁油，薯片放耐左會標油，有大朕油膱味。而佢炸完出黎個薯片仲係好乾身，波浪型個表面冇油份。然而齋薯片好寡，個雪糕先係點題既部分。用薯片做匙去筆雪糕食，又咸又脆既薯片令雪糕個甜味更突出，而且係雲呢拿味先咁配合到，換左朱古力或者其他濃味既雪糕都做唔到呢個配搭。