康瑞甜品

營業中

休息中

同屋企人喺深水埗食完晚飯，意猶未盡，發現原來我哋就喺康瑞附近，當然唔可以錯過。作為自家製芋圓專門店，甜品大部份以芋圓做主打，配合各種冷熱糖水，配搭雖然唔多，但基本嘅紅綠豆沙、西米露、薑汁、仙草同酒釀桂花都有齊，鍾意食中式糖水嘅話的確係一個好選擇。我揀咗椰汁紅豆沙配，加入芋圓、地瓜圓同小丸子，紅豆沙唔出色，起沙效果唔太明顯，似食緊穀物粥，另外芋圓同地瓜圓唔煙韌，煮得太稔冇乜口感😢有啲失望，真係非常一般⋯⋯特式仙草百配除咗有仙草、芋圓同地瓜圓，仲有珍珠、薏米、紅豆、西米同小丸子，配搭相當豐富，味道微甜，感覺好清潤，雖然芋圓同地瓜圓口感都係太稔，但有煙韌嘅珍珠同清爽嘅仙草搭救👌🏼糖水另外配有植脂奶，可以自己加入糖水同調較份量，不過個人認為唔加比較好味。作為一間標榜賣芋圓嘅糖水店，佢嘅芋圓同地瓜圓的確令人失望，但糖水底不過不失，下次或者試吓凍嘅糖水會好少少。