霸王山莊 (已結業)

請食飯就請得多，霸王飯就未食過。今次老細請食覇王套餐，幫森哥洗下塵，又豈敢怠慢即時九秒九訂枱。估唔到呢個覇王套餐咁正，足足有八道菜加甜品，而且樣樣交足功課。我最欣賞呢道翡翠黃金蝦，蝦球爽口彈牙又大隻，咸蛋王鹹香沒有蓋過蝦的鮮味，反而相得益彰。京滬三色併盤有燻鯧魚、醉雞、糖醋排骨，各有特式。再黎沙鍋雲吞雞，細細盅沙鍋一人一盅，雞燉湯鮮甜滾熱辣，仲有大大粒菜肉雲吞，食落暖笠笠。除左有得食，仲有得玩，呢味肉末叉子燒餅，要用叉子將肉碎釀入燒餅袋入面，漲卜卜咁得意好食又好玩。上海粗炒同覇王小籠包都係飽肚之選，味道卻一點也不馬虎！甜品係「浪奔浪流」的上海灘荳莎鍋餅，食落甜而不膩。